من طرف باقة منوعة من الاغاني الشعبية الراااائعة
اغاني حصرية .. كتبتها بيدي نقلا عما رددته جدتي
.
.
اغنية شعبية ... للضيف ...
يا هلا في ضيفنا الي إجا ع الدار ..
مثل القمر لا تحلَى في أيام آذار...
يا هلا في ضيفنا الي إجا ع البيت ..
مثل القمر لا تعلى في ليالي الصيف..
يا هلا في الضيف ضيف الله
ع حساب الروح اي والله
ما بنرضى تروح من عنا
ما بنرضى اتروح لا والله
مرحبا يا ضيفنا الغالي..
يالي ضفتنا وسط النهار العالي
والشمس تلظح شالتك والهم عنا زال
يا مرحبا بك يا ذياب بن غانم ...
يا بحر عكا يا قوي العزايم من غيبتك صارت علينا مخيفة ..
وفي حضوركم صارت علينا آماني..
***
يا مرحبا يا ضيوف من ضفتونا ... واخضرت الدنيا و آنستونا
واخضرت الدنيا وفتح وردها ... واخضر فيها كل ورد يابس
***
اغنية جفرا .. بمنطقتنا برام الله
جفرا وهي يا الربع بتكشي وبتلمي
مدقدقة بالوشم ع داير الثٍمِ
والله من جد البدل لبدلك بإمي
وبخواتي الاربعة وأبوي رهينة
جفرا وهي يا الربع ...
تلمي التبن بالخيشِ
وإلي جوزها نذل ترخي جدايل ليشِ؟
جفرا وهي يا الربع....
تخبز على الصاجِ
وموشمة بالوشمِ خرفانِ ونعاجِ
لا تزعلن يا سُمِر والبيض غناجِ
والبيض شحم القلب والسمر عينيا
عليا ام ويل الهوى عليا ولية
يا جوخ لفصلك للحلو صدرية..
***
للعريس " خالد " في فترة مراسم العرس
يا خالد وصف غزالك وصف
يا ريم غزلان من احلى الصِفا
يا خالد وصف غزالك ع المبات
يا ريم غزلان من احلى البنات
يا خالد وصف غزالك على العين
بنات عمتي كاملات الزين
يا خالد وصف غزالك على القنا
يا شيخ العرسان تقولك هناااا
يا غزلان ع المناهل واردات
منو صادهن ابو العقل الثبات
وخالد صادها ابو العقل الثبات
وعلم الشباب على صيد البنات
يا غزلان واردات على القناة
وخالد صادها يا ريتها مية هنااا
***
مهاهاة " لخروج الاسير من السجن "
بنقول السجن ما هو حٌقرس ولا عقارب بتقرص
السجن سجن الشجعان بيوفي الوعد وبيخلص
ولا تحسبونا من طيحة السجن ذلينا
ناموسنا في الراااس واحنا اتعلينا
....ليليليليليليليلي..
***
اغنية وطنية شعبية
طلع المنادي ينادي على جبل عمان
فلسطين بدها قوة وما هي طوشة نسوانٍ
وطلع المنادي ينادي على جبل رام الله
فلسطين بدها قوة وما هي طوشة حاياالله
وطلع المنادي ينادي على جبل المكبر
فلسطين بدها قوة ما هو حكي مكبر
وطلع المنادي ينادي يصلي ع النبي الهادي
دخلك يا ربي هذي فلسطين بلادي
وطلع المنادي ينادي على جبل رام الله
دخلك يا ربي هذي فلسطين وطنا
***
هذي فلسطين حايطها بحر مالح
فيها امين الحسيني كلامه جارح
هذي فلسطين حايطها بحر مية
فيها امين الحسيني كلامه غية
***
اغنية وطنية لمناسبة نفي امين الحسيني
هاتوا الجريدة وهاتوا قلمها
تنشوف فلسطين مين استلمها؟
هاتوا الجريدة وهاتوا دواها
تنشوف فلسطين مين تولاها
سافر مفتينا والي سنيني
الصخرة والحرم عليه حدٍينٍ
زامور الخطر في القدس صاحي
يا عبد القادر في القسطل راحل
زامور الخطر في القدس غنى
يا حسرة قلبي على وطنا...
***
اتمنى ان تنال اعجابكم
» عدرا يا فلسطين????????
» كورونا - الشاعر : عطا سليمان رموني
» رحل ولن يعود
» كوفيتي عنواني
» كل يوم نصيحه ومعلومه
» اللهم ارفع مقتك وغضبك عنا - الشاعر : عطا سليمان رموني
» هنيال من عطا له أخ - الشاعر : عطا سليمان رموني
» الأخذ بالأسباب - الشاعر : عطا سليمان رموني
» بعد غياب طويل عدت لكم من جديد هديل الحمام
» رعاية ذوي الاعاقة - الشاعر : عطا سليمان رموني
» صفقة القرن اللعينة - الشاعر : عطا سليمان رموني
» شافي انت الشافي - الشاعر : عطا سليمان رموني
» اصحب للجماعة - الشاعر عطا سليمان رموني
» يا ارضا عشقنا تربها الغالي