الاديبه ابتسام ابو واصل محاميد - فلسطين-ستي من ام الزينات

من التراث الفلسطيني
حكايات ستي (جدتي )
ستي حكتلي حكايات
عن قريتها يا سادات
عن بلدتها لصغيرة
عن خربه إمّ الزينات
عيشتها بترد الروح
من الله تيجي الخيرات
كانت عيشه هنيه ...
خبز وزعتر والزّيتات
لمينا حب الزيتون
وستي تغني تهليلات
رضيع بحِذلُه مبسوط
حوله تلعب لبنيات
حجر البَّد بعصر زيت
موسم خيرات وبركات
خبز مسخن بالطابون
هاتوا نّحمِّر الجاجات
لطفي ومسعود وايوب
أَخذوا الأكل للجارات
واللمّات بحوش الدار
تسعد قلب المزيونات
جمعه كبيرة من النسوان
أختي وعمتي والخالات
زغروده هون وهناك
طهرّنا محمد بالذات
بباور العيله هدّار
عمتي تحضر الطبخات
إمي تنادي يا بنتي
شدي إيدك بالعجنات
محلا أيامك رمضان
خذ الصحن مني وهات
ومسحرنا طول الليل
يضرب ع الطبله نغمات
يا نايم قوم اصحى
يلفِّ البلده والحارات
والفرحة تدخل لبيوت
لما نسمع تكبيرات
طابون الحاره مشغول
وبنستنى بالكعكات
سيدي واخوالي طلوا
عيديه قروش وليرات
ويا محلا ميّات البير
تنقلها ست الستات
الجرة والعقدة ع الراس
بتفنَّن بالميلات
وصغار الحاره لعبوا
الغميضه والحجلات
جدي بيحرث مزرعتو
وابوي يبذر الحبات
برد الشتا هل وطل
واشعلنا نار وفحمات
وجمعنا حطب للبيت
حزمه حزمه من التلات
والحصّادي بيتغنوا
اوووف وعتابا وآهات
عصيدي للحصادي
غداهم بالزوادات
إم شحاده وإم الياس
بذرِّين بالقمحات
والمِدَراس بالساحة
واﻷطفال ثقّالات
وجاروشة ستي بالبيت
نجرش فيها العدسات
وقمح البيدر بالطاحون
ذرة وبرغل وشعيرات
رجال الحارة بيلتموا
لشورى وصلحه وحكايات
برميل الجفت بالكاز
نوره مضوي للسهرات
هاتوا الطبله وشدوا الكف
تا نحيي هالتعليلات
خيالي إجو من بعيد
على خيول مسرّجات
ونسوان البلد هلُّوا
على العرس مزينات
عريس الزين يتهنى
الحنّا جيبن يا بنات
والحدايه بيصدحوا
وشبيبه تعزم شربات
حيا الله بأبو محمود
بالزفه تعلى السحجات
والعروسه مزيّنه
بعقد ذهب من ليرات
والقفطان والقمباز
لبسوا سيدي بالحفلات
والِعقال والحطّه
شهدوا أكبر الثورات
وثوب ستي لمطرز
تغنت فيه الشاعرات
بفلسطين طرزناه
وغزى كل الحضارات
ابتسام ابو واصل محاميد
28-10-201